سالفة ابو الحلال
اكو واحد عنده حلال ويرعى بيهن وياخذ وياه متاعه وسلاحه كان برنو ويطلع من الصبح و قبل لاتغرب يرجع لهله
هذاك اليوم يمشي بجزيره ومن تعب كعد وحلاله كدامه اجته حيه وعضته وفرغت سمها بيه بعد شيسوي وهو بجزيره وماكو واحد يمه حتى يساعده ظل يعالج بروحه وماكوا فايده الى أن مات وحلاله طش بعيد وهو ميت لهناك اجو اثنين يمشون
ويشوفون هذا الزلمه متمدد ظلو واحد يكل للثاني اكلك هذا الزلمه غريب مانعرفه هذوله حفرو حفره ودفنوه واخذو البرنو مالته وراحو اخوه ظل يدور عليه مالكاله اثر مر على وفاة اخوه ثلاث سنين
واخوه يدور هذاك اليوم طلع بمكان بعيد عن اهله وبالصدفه اجو ذوله الي دفنو اخوه
وسلمو عليه رد السلام عليهم وجان يشوف البرنو مال اخوه كاللهم انتم وين ديرتكم كالوله احنه بفلان ديره طلع وياهم وعرف مكان سكنهم وجان يعت البرنو منهم وياخذها
وكاللهم هايه البرنو مال اخوي وانتم الكتلتوه
كالوله احنه ماكتلنا اخوك وحجوله السالفه
وما صدكهم وكال الهم هذا حجي يفيدكم
كالوله خويه انت هسه تهمتنه فوك زينيتنه
تعال ويانه ندليك المجان الي دفنه بيه اخوك دلوه على المكان وكاللهم اني رايح ويصير خير كالوله خويه انت شنهي التريده احنه حاضرين بس مو احنه الكتلنه اخوك
مافاد الحجي وياه آخر شي صار رايهم يرحون للفريضه اتفقوا على يوم وحضرو كلهم وراحو للفريضه من وصلو سولفو هذوله المتهومين الثنين وكالولوه بكل السالفه
واخوه امجلب بيهم ماكو غيرهم الكتلو اخوي
الفريضه معدل وفاهم كاللهم هسه انتم من افرض عليكم تقبلون بفراضتي لوعدكم راي آخر
كلهم كالو شيخ انت صاحب بخت ومعروف وقابلين شتفرض علينا
كاللهم خوش هسه اني اريد تجيبولي عظام من جسم الميت وتجون جابوله عظام الميت
وطلب الفريضه يجيبلوله طاسه وخله العظام بالطاسه وفورهن على النار ونزل الطاسه ومن شاف الفريضه برد الماي طلب انوب يجيبوله كلب - اجلكم الله - جابو الكلب وهايه الناس تباوع شراح ايسوي الفريضه
الفريضه كام وشرب الكلب من الطاسه البيها الماي مال اعظام الميت
وكاللهم من يوكع الكلب كلولي ظلت الناس تراقب وصدك وجان الكلب يطيح ويموت هاي الناس تعجبت
وجان الفريضه كام على حيله وكال لخو المكتول اخوك مامكتول اخوك مسموم بسم حيه
وسلامتكم
شاهد سالفتنه ورباطها
خويه تردون الصدك اني دخت بهاي السالفه
شنهي من عقل عنده وهيج علم وتره هيه موهبه من ربك ومن تكون صادق وصاحب بخت ومن تكون عندك مخافة لله سبحانه وتعالى يزيدك علم اكثر لخدمة الناس
وهسه وين الكاه هذا الفريضه المعدل
ويجي ويشوف طراكيعنه ومصايبنا ومشاكلنا بسبب الاستعجال
ويتهمه وهو ماعنده ادله عليه والباقي عليكم
خاف يزعلون بعض الناس من احجي وطولت عليكم واسال الله ان يحفظكم اخوتي في هذا الديوان ومن يقرء منشوري ويبعد عنكم هذه البلاوي ويسعدكم انتم وعوائلكم ….. ودمتم سالمين بحفظ الرحمن. منقوله بتصرف
الرئيسية 
